Quanti pinzieri l’urtumu ti l’annu
nò vviti l’ora cu ssi nni vai šcappannu;
facendu li cunti ti cuddu ca t’è ddatu,
sò cchiui li uài ti ciò ca t’è llassatu.
Pienzi a ll’annu ca, prontu, šta cu trasi,
e šta tiri li minuti cu vvai e tti lu vasi.
Ci sà nnuci saluti e ttanta pruvvitenza,
lu portafogliu chinu e ppuru la critenza.
Si spetta, ccussì, cu rriva menzanotti
apri buttigli, spari fuechi e bbotti.
Si mangia e zzumpa, si tannu l’Aucùri
genti t’ogni razza, pòviri e ssignuri.
Pi nnu mumentu, ti tuttu nni šcirràmu,
pari ca la štoria nui la šta firmàmu:
ùai e dduluri, tèbbiti e prublemi
comu sia ca nisciùnu cchiù nni teni.
Si usa, poi, cu iàtichi ddà ffori,
appena l’orologiu segna l’ori,
piatti filati e šcigghi šcumbinati,
fannu fracassu, ènchiunu li štrati.
E’ nna càuci a ll’annu ch’è ppassatu
e ll’Aucùriu a cuddu ch’è rrivatu.
E pienzi, ca lu mundu si šta cangia,
nišciunu cchiù nò tteni cu nnò mmangia,
viti nnu mundu ti gioia, t’allicria,
nišciunu ca šta mori ‘ntra lla via.
Li uèrri, comu sia hannù spicciatu,
nò ssienti cchiù sparà nnu carrarmàtu,
ntra lli casi o pi lli štrati nò ssi cciti,
bandieri ti paci vìti nanzi a lli pariti.
Mentri mi fissu sobbra šti pinzieri
l’ambulanza šta sona com’a ieri,
pàssunu crištiani, li sentu lliticari,
e ll’annu nuevu ncora avà ncignari.
Sempri, ccussì, la štessa šciniggiata,
viti la vita ca nò nc’è cangiata.
E’ štata nna spiranza, nn’illusioni
ca s’è sgunfiata, com’a nnu palloni.
Emanuele Castrignanò
Per restare aggiornato seguici e metti “Mi piace” sulla nostra pagina facebook, pubblicheremo al più presto tutti gli aggiornamenti in merito.
Seguici su Facebook: https://www.facebook.com/mesagnesera/