Ogni ffiata ca si vota
lu paisi si rrivòta,
canditati mpruvvisàti
e mminèstri già scarfàti.
Tutti vannu pi ssirvìri,
crazzi, puru, nci am’a ddiri,
pircè ticunu ca fannu
cosi bbuèni, senza tànnu.
Ci sta’ n lista, mo saluta,
sta crianza, mai avuta,
prima no tti canuscia,
mo ti ferma pi lla via.
Ntra lli casi no ssi vai,
lu telefunu mo stai
e tti cercunu amicizzia
né ppi pilu né mmalizzia.
St’a cci è ffattu li primàri
c’hannu stati cazzi amari,
Zezza, menchia, s’è ncazzatu
e llu Mastru ddà è mmullàtu.
Calabresi, fo’ lu primu,
tissi: “A mmaggiu, ndi vitìmu”!
St’a cci tai cchiù ppilu a tutti
ti Luritu v’a lli Crutti.
Questa, sì, ch’è nn’atra storia,
pi cci è ppersa la mimoria;
quanti s’èrunu scuntrati
mò, miràculu!, mbrazzati.
Matarrelli, cazzu-cazzu,
pigghia tutti sotta razzu,
v’a llu bbarra, nnu cafei:
“Qua lu votu tocca a mmei”.
A lla ggenti no ntaressa
a cci crita o si cunfessa,
voli ci è cca sapi fari
e ccu ppozza cuvirnàri.
Poi, no cconta lu culòri,
ci nci manca lu sapòri,
bianchi, russi, vierdi o ggialli,
qua nci vòlunu li palli.
E iu, no ffazzu distinzioni
ntra carosa o masculoni,
ticu: “Attienti, fili mia,
ca po ‘ssi la terza via”!
Per restare aggiornato seguici e metti “Mi piace” sulla nostra pagina facebook, pubblicheremo al più presto tutti gli aggiornamenti in merito.
Seguici su Facebook: https://www.facebook.com/mesagnesera/
Widget not in any sidebars
Widget not in any sidebars
Widget not in any sidebars
