Ccè grandi fešta ca si faci a llugliu,
tuttu lu paisi si nni v’a ssubbugliu,
si nnura la Matonna Prutittrici
ti tutti vinirata, ci sa nni bbinitici.
Impegni e tradiziuni ti sieculi passati,
li mišciagnisi mai s’hannu scurdati.
Ti uài e di discrazi, ti tanni e dištruzioni
nni l’hamu šcuppulata pi quedda prutizioni.
Si ncegna misi prima a ffari e štrulicari,
pinsandu a ccosi bbueni e a ccunti ti quatrari.
Nc’eti nnu Cumitatu, ca ggira li riuni
pi ccogghiri l’offerti ti crandi e ddi vagnuni.
Entusiasmu e ffatia, fatta cu ppassioni,
pi lla Matonna noštra purtata ‘n prucissioni.
Crandi fištiggiamienti cu ffuechi, bandi e lluci;
nci štà nna cunfusioni ca vue’ cu tti nni fuci.
Arrìunu furaštieri, arrìunu l’emicranti
cu lli mugghieri bbiondi mpizzati nanti a nnanti:
lu veru mišciagnesi an forza av’a tturnari,
veni pi lla Matonna ca l’ava ssà priari.
La fešta già ccumenza facendu la nuvena,
la chiesa ti lu Carmunu la viti sempri chiena.
E ppuru lu paisi è prontu e priparatu:
li casi e lli facciàti già tuttu nquacinàtu.
Si ppèndunu lampiuni an gloria ti Maria,
si tìcunu rusari ntra casa o pi lla via,
sonunu li campani, essi la prucissioni:
migghiari ti crištiani cu ttanta divuzioni.
E quandu poi si ferma ‘n mienzu a lla Porta Crandi,
ti parunu furmiculi assì ti tutti vandi.
E’ nnu mumentu bbellu, emozionanti assai,
lu Sinducu a Mmaria cunsegna quiddi chiai.
E’ ssegnu ca turnamu a Edda cunsacrati,
puru, ca li iaštemi no ll’amu sparagnati.
Tornunu tutti l’anni, gioštri e bbancarelli:
nci truevi la šcapeci, pagnotti, caramelli,
lu zzuccuru filatu, ggilati e po’ spumuni,
tanti šcintrusamienti, giucattuli e ppalluni.
Carosi e ggiuvinotti, capiddi sištimati,
si mmutunu cu rrobbi, appena cunsignati.
Li femmini a ppasseggiu cu šcarpi nuevi e štritti;
maisia si šcosi l’àbbutu, li viti tritti-tritti.
Li mašculi, ca mangiunu cu ppuzu e ccu suštanza,
portunu la curea cchiappata a ssottapanza.
Ma quandu a cunclusioni, si nni šta vvai la fešta,
prutenti Ton Danièli: “Sapiti ce nni rešta
ci no cangiamu nui? Rèštunu to’ taieddi
e ppò li štrati chini ti šcorzi ti nuceddi !”
