(da Raccontare Mesagne)
Nna carezza a ccuiri piccinnuddi
…e una puru, alli ciucci cruessi…
Pi quattru vagnuncieddi educati.
Hannu fattu, nn’articulu ti ggiurnali.
Ca štaunu li mundizzi iaticati.
E lloru l’hannu ccueti…e mmenu mali!
Mundizzi “ti la Matonna”, dda lassati.
La “Fešta ti Misciagni” cchiù nnurata.
Ti devuzzioni, ggioštri e passiggiati,
mma sapì poi pircè…ccussi mmucata.
Cce ARTICULU! Cce priesciu e battimani!
Cce applausu ca nci voli a šti vagnuni!
Mma no ssi parla e štammindi luntani,
ti ci hannu štati poi…li mmucatuni.
Pircé!?? Cuddu štraliesciu fattu n‘terra?
Pircé!?? Cuedda montagna ti rummatu?
Ci è štatu!?? Ca l’è fatta cuera “uerra”?
E pircé mmai!?? Nisciunu è pulizzatu?
A quattru vagnuncieddi šta spittamu!??
Tre sittimani toppu lu bburdellu!??
Cce bbella educazzioni ca nci damu!!
Ccussì scrivimu poi: Uè, vi’ cce bbellu!
Misciagni è nna città totta educata.
Tinimu li vagnuni…scopaštrati.
Misciagni è nna città e s’è libbirata.
Ti cuiddi tiempi brutti e ormai passati.
Ci tecimila fannu mmucaria.
No n‘centra. Lu giurnali no llu dici.
Pi quattru, ca poi fannu pulizzia.
ti mpašta la nutizzia e tti la frici.
E qua, n’c’è veramenti cu nci pienzi.
Cumpà: Mma a cci uè pigghi tu pi fessa?
Ca scrivi e scrivi, senz’a scrivi nienzi.
E cangi puttanata…mma è la štessa!!
Li cosi ca uè mmatti e ca mpapuecchi,
li štipi pi cci dormi e cci no vveti.
Mma poi nci štannu quiddi cu lli “uecchi”,
ca sannu cce ssi creti o no ssi creti.
MENTALITÀ, si dici in itaglianu!
E nno nci cangia certu ntra ncu n‘annu.
Va ddinciulu a qudd‘atru ciarlatanu.
Cu sbascia l‘ali e ggiušta ncunnu dannu.
