(di Luigi Tamburrini) Ca cce nni sienti, ormai cchiù unu!?? Ci sa’ ca Misciagni lu chiama…PAISI!??
S‘hannu fissati cu lla…CITTÀ!!!
Ormai, quasi tutti, sontu…bbarisi…
Lu Capoluogu mo’ si šta spošta,
ti cientu chilomitri bbasciu ddo nui.
E alla “REGGIONI” cumanda Misciagni!
Zitti, e nnisciunu cu parla cchiui!!
Mò lu tinimu lu “ggiuštizzieri”.
ZZORRU!! Ca a tutti nd’è riscattati.
Nnu palcoscenicu a Piazza Orsini.
Sona crammofunu e mmena ballati!!
Cu štu riscattu ch‘è štatu tremendu,
totta Misciagni s‘è ddiscitata!!
E cci la ferma mò…la vendetta!??
Totta la Puglia štai nginucchiata!!
L‘economia šta scoppia saluti,
li turcinieddi no bbaštunu mai!!
La Porta Crandi mò voli llargata,
ca ti turišti nni passunu assai.
Cce bbelli tiempi ca hannu rrivati!
Cu ZZORRU nueštru so’ cazzi amari!
Ca li mazzati ca ndi pigghiammu,
mò tutti a ggretu nci l‘am‘a ddari.
È ddittu ZZORRU: Vagnù spittati!
Ggià l‘atu vištu cuddu ca fazzu!
Ci mi azati cu nchianu cchiù iertu,
a ttutti l‘atri…nci fazzu lu mazzu!!
Iu quantu nchianu, no tegnu avversari.
Soltantu Misciagni iu cusciutu…DDA!
Pircè è rrobba mia e l’agghiu ndrizzata,
e nnienti e nnisciunu mi l’av’a ttucca’!!
Ci Masaniellu, dda feci furori,
mò mancu Napuli la venci cu nnui!
Ti la fucazza nui simu li meštri,
e mmancu la pizza ndi bbatti cchiui!
Forza Caštieddu! Orgogliu ti štoria!
Tu ca ssittavi li crandi…MAIŠTÀ…
Mò sinti casa, ti ARTI E CULTURA!
E t‘agghiu fatta…NA CRANDI CITTÀ!!!
