PAROLI A IUNDULU!!
Lu pisu ti li paroli,
ormai no vvali nienti.
O ditti alla bbuscìa,
o ditti alla veramenti.
Sparati ntra nnu Bbarra,
o alla televisioni.
O a nnu cristianu sulu,
o a ccientu o a nnu miglioni.
Li scrivi nnu ggiornali,
li dici nnu cumizziu.
Ormai si mbrogghia tuttu.
Sì faci nnu štrifizziu!!
Sì sarva ncunnu libbru.
Mma ormai si leggi picca.
La chiacchiara ca vula,
è ddivintata ricca.
E ppoi, lu bbellu eti,
ca tuttu ormai si scorda.
So’ ttanti li puttanati,
ca…ci si li rricorda!??
Ci ggiri ntra internettu,
migliardi ormai nci nn‘eti!
E ffannu tanta negghia,
ca cchiù nnisciunu veti!!
Uardativi Misciagni!
…MISCIAGNI EMANCIPATA…
Ca ti la telinguenza,
si dici: È LLIBBERATA!!
Paroli assai pisanti.
Cce ppriesciu! Finalmenti!
Mma poi LI FATTI dicunu:
…PAROLI INUTILMENTI…
Nnu populu “scurdatizzu”,
la verità eti questa!
Lu ncuerdi cu nnu bballu,
la musaca e nna fešta.
Quattru paroli a iundulu:
LI MEGGHIU SIMU NUI!!!
Ci li mprosa Bbrunu Vespa.
…NO SSERVI NIENTI CCHIUI…
