Buona Pasqua

E’ Pasca! 

E’ Pasca, sònunu a festa li campani,

‘nu puricìnu si scarfa ‘ntra li mani,

è ‘ssùtu t’intr’a n’òvu appena ruttu,

nasci ‘na vita e teni lu ssigghiùttu.

Giurni so’ di festa e di litizia,

appena s’è spanduta la nutizia

ca Cristu, ch’era statu cundannàtu

a morti ‘n croci, mo’ è risuscitàtu,

cu sarva l’omu ti tutti li piccati

ca pi’ li vizi no’ l’era sparagnati.

Giurnu ti brasciòli, maccarruni,

toppu tanti giurni t’àddasciùni:

puddìca, ovi, friseddi scilippàti,

mustazzuèli ti menduli stumpati,

po’ spumetti, suspiri e buccunòtti

pastariàli, purpetti, panzarotti,

sazizza cu l’agnellu ‘rrusulàtu

sànunu stòmucu e, puru, lu palàtu.

Pari ca Pasca ‘rriva pi’ mangiari,

ma Cristu risorgi, no’ ti l’ha scurdari!

Emanuele Castrignanò