Ci penzu, alla situazzioni comu é štata, cce nc‘aggh‘a ffari? Mi scappa nna risata. Nnu sinducu normali, ti certu non é štatu!!
Ticimu ca alla fini… nnu santu é ddivintatu!!Cu ssienti l‘opinioni, ti tanti misciagnisi. Miraculi nn’è ffatti, facìa chioviri turnisi!!
Misciagni, ntulittata quantu mai! Mmutata cu ggiuielli ti cultura! Li fešti a Piazza Orsini propria assai!! Cce anni bbelli e cce bbella ficura!!
La vita, s’era propria rrivutata. La ggiuvintù rištava e nno ppartìa. A ognunu s‘era aperta ggià nna štrata,
cu llava piatti ntra nna pizzeria.
Nnu fiumi, poi tagghiava LA CITTÀ!! Ti acqua sempri limpada e pulita! Bbunnanzia fatta ti felicità.
Ognunu rispirava nn‘atra vita!! E mmo ca si nn‘é ssciutu, cce ssi faci?
Ci trova nn‘atru santu ccussì fforti!?? Nisciunu cchiui po‘ essiri capaci, ti tanta rricalata bbona sorti.
Siccomu a mmei mi piaci “lu palloni”, no ssacciu mo‘ ci lu sapiti vui.
Ca a Nnapuli, llivara la quistioni, la maglia…10…no nci scioca cchiui. Ca foi ti Maradona, cu ssia chiaru!
Ormai Patrunu e Ssantu ti nn‘altari, ca mmarca a ppieti cucchi San Ginnaru!
Divoti dda ogni ggiurnu, mma a migghiari!! La “maglia” ti nnu sinducu é lla seggia!
Ti ddo facìa miraculi, ssittatu. L’ufficiu trasfurmatu a Chiesa e Reggia.
Turismu a pagamentu…e nginucchiatu… A ciunca veni toppu!?? É ggià ccappatu.
Ci no…lli spara ierti… É ccundannatu!!!
La verità, si scondi, alli crištiani. To’ puttanati, …e bbattunu li mani…
