Avìa bbuènu ca si sta strulicàva
ti lu fuècu ca a Misciagni sta cuvàva,
si privitìa, nu certu, ddirramòtu
‘na vota saputu l’esutu ti votu.
Lu centru-destra, divisu e squnquassatu,
e lu PD tuttu quantu squintirnatu
sta spetta e spera cu veni qua Emilianu
spirandu, armenu, cu po’ da’ ‘na manu.
Regista ti tuttu è statu Matarrelli
cu fotti e dividi partiti, già fratelli,
li vecchi cruppi tutti è scumpagnati,
degnu tiscepulu ti l’Onerevuli Caiati.
Gira ti sera, ti giurnu e di matina,
teni cirvièddu ca mai cu si rrifìna,
si ferma cu tutti, parla, conta e dici,
e ci nci cièrchi li peri ti passa calaprìci.
Tutti lu sannu, è lu mumentu sua
sta ccogghi lu cranu e si pripara all’ùa,
e cu Molfetta Sinducu e po’ Ginu Vizzinu
s’è futtutu lu Palazzu Celestinu.
Mo’ è mandatu, puru, alla Rigiòni
‘nu bbuenu figghiu, ‘nu santù vagnòni,
ma tutti sannu ca nc’era lu zampinu
ti quddu frušculu ti l’attàni Ginu.
Ma quanti cosi strani, poi, hannù ccappàti
li candidati nobili e trumbati:
pigghia, pi casu, ti Ntognù Bardaru,
ti sicuru, ca sta gnotti ancora amaru,
l’affrontu avutu, ‘n’offesa pi la storia
puru pi lu rispettu alla mimoria.
La stessa cosa vali pi Briamonti,
lu cuerpu l’è pigghiàtu propria ‘n fronti.
Iu, nci lu tissi: “Uè Vì! Vì! Non ti nfugnàri,
no’ fa’ lu fessa, non ci l’ha puè fari”!
M’è dispiaciùtu ti Rogoli, Segretariu,
rumastu all’assuttu nsiemi a Montanaru.
E mara a Ture, ca quasi era arr’arrivatu
ma poi nsiemi a Piru è pariggiàtu,
corpa ti ‘na leggi, o , puru, na sintenza
poi puru iddu è rumastu senza.
E’ statu lu tistinu, è statu sfurtunatu
pi quddu nomi ca s’è prisintatu
‘ntra lista cchiù sotta l’è tuccatu
e Piru non catèndu Ture s’è mangiatu.
Si trova, puru, a ci jàtaca sintenzi
e sta perdi la capu e cchiù li sensi,
pi sapìri l’autori ch’èti statu
cu faci fari lu votu dissociàtu,
lassandu ti fori, ccussì, la canditata
toppu n’impegnu e na parola tata.
Quantu successu, è statu nu signali
pi ncununu ch’è spicciàtu allù Spitàli,
ti pressa e di corsa Ignoni l’è sarvàtu
e grazzi a Ddiu ntra nui è riturnatu.
Ma moni, nu cunsigliu v’agghia a dari:
“Ci pi casu lu votu no’ puè dari,
no’ perdiri tiempu, no’ diri cchiù ti tantu
maisia t’hannà purtà allu Campusantu,
e ddà, na vota ca intra tu ha trasùtu
riesti ntustatu intr’allù chiaùtu”.
Eran trecento a Misciagni canditati
e quasi tutti pi strata hannù forati,
li vitivi già tutti ‘mpirnacchiàti
ma toppu quattru voti hannù ccucchiàti.
Molfetta, ch’è Sinducu, la Giunta teve fari
e ‘ntra tanti pritindenti av’à scapàri.
E’ megghiu ci va’ intra o megghiu ci va’ fori?
Bè! Iddu lu sapi bbuenu, è nu tottori.
Ma prima sav’à fa’ lu Prisidenti
e ddà nci voli unu competenti,
ci si va’ trova unu ch’è Avvocatu
armenu lu capimu na vota ch’è parlatu.
Sta gira voci ca èti Semeraru,
la megghiu fica t’intra lu panaru,
partìu ti destra, mo’ sta ‘ntra n’atra stanza,
po’ fa’ lu capu ti sta bella MMIŠCULANZA!
