No sso’ ddi penna, né scriu cosi ierti,
cosi subbrani, senza cu scavuerti.
A Ermis šta cosa li piacia,
e ddicia: puru quešta è ppuisia..
Quandu no ndi ccuntraumu, li mandava
cciò ca scrivia, e iddu, po’, spittava
ci Maria o Italu lu telefunu l’apria,
liggia, e iddu prisciatu si cutia.
A ccasa ti l’attani hagghiu crisciutu,
Deciu, Carlu, Elisa m’hannu bben vvulutu.
Omu ti cultura e ddi sapiri,
puzzu ti scienza, ca no nc’è cche ddiri.
E ccomu tutti li crandi, iat’a lloru,
tuttu cciò ca fannu vali oru.
Ma nnu merutu ti cchiu’ iddu tinia:
muteštu, semplici, ti crandi cumpagnia.
Spadda tretta e ddi crandi valori
a ttutti li štutienti s’è ddatu cu llu cori.
Ti tutti rispittatu, ti tutti ricircatu
omu t’atri tiempi, crandi littiratu.
Avia picca ca nd’erumu sintuti,
ma ndi lassammu nnu picca nnamaruti,
tissi, cu vvoci lenta, ca no nci la facia
e ddi sicuru ca tuttu šta ffurnia.
No mmi pari veru ca mo’ nd’è llassati,
iddu, ngarbatu, ca no nd’è ssalutati.
Osci šta vvegnu, t’agghi’a ddummandari
comu mai nnu crandi com’a ttei,
è vvulutu bbeni a unu com’a mmei.
Pi avi’ nutizi, Italu ddummandava,
ca pi ffilu e ppi segnu m’infurmava.
Ogni ssabbutu c’ a Mmisciagni vegnu,
sacciu ddo ti trou, e ssenza ritegnu,
ti salutu e lleggu quera puisia
ca ti facia ritiri e ttantu ti piacia.
Quandu sarà c’arretu ndi ncuntramu,
nna mpruvisata, nna cartella ‘n manu,
cu lla Tivina Cummetia fatt’a Mmisciagni
s’ann’a ppiscia’ ti risa li santi e lli ccumpagni.
Ti lu nfiernu, paratisu e ppurgatoriu,
ntra nnu poštu cchiù grandi ti la Di Vittoriu,
hann’a vvini’ tutti, puru Virgiliu e Ddanti,
ca pi rrispettu li ssettu nanti nanti.
Ci Danti pensa ca so’ ti la serva scura,
ticu: So’ ddi Misciagni, Capitali ti cultura,
so’ amicu ti Ermisi e sso’ rracumandatu
comu quandu, a spassu, Virgiliu t’è ppurtatu.
Danti mia, pi nnavita, t’è propia cuscitatu
no nc’è vvagnoni ca no ss’è nnamuratu,
sintenddu Ermisi comu ti liggia,
cce ieri scrittu, ca picca si capia.
Mo’ ti salutu, e tti lassu ‘n cumpagnia
ti šti quattru viersi ti ntra lu cori mia.
Comu sempri, mi spettu nna risata,
cu mmi ncuerdi, mi l’hagghiu mmiritata.
Mesagne, 21 febbraio 2024
