Ci penzu a quru giurnu ccè successu
no’ ssacciu ti ddo’ partu e ccomu nn’èssu:
lu mundu, sottasobbra e rrivutàtu,
parìa ti nn’atra uèrra šcunucchiàtu.
Mpalati nant’ a llì televisioni
vitèndu sulu muèrti e dištruzioni;
t’ogni pizzu ti mundu e ddi nazioni
si sintìunu cundanni e ndignaziòni.
Atti ti terrorismu e ddi paura
šcunvulgèra l’Amèraca sicura,
la putenza mundiàli cchiu’ timùta,
parìa ca ti corpu era sparùta.
Nišciunu si sintìa cchiù sicuru,
uardàndu quddu cièlu tuttu gnuru
ti fumu, fuecu e tterra ca vulàva
suttirràndu tuttu quddu ca ncuntrava.
Tanti firiti, muerti rrusulàti
ntra li Torri ca brušciàunu svintràti;
ma la paura cchiù forti, mò lu ticu,
era nò ssapi’ ddò štava lu nimìcu.
Ccussì, li Torri ch’èrunu giganti
s’èrunu piecàti a lli bricanti,
era lu segnu, pi’ cci cumandàva,
ca lu mundu, mò, šta trimulàva.
Muerti nnucienti e llacrimi virsàti,
so’ lli prièzzi ca l’Amèraca è ppaiati.
Nò sso’ li uèrri ca fannu l’omu ucuàli,
ca ènchiunu campusanti e lli spitàli.
Sulu la Paci pò ssarvà štu mundu
šcrafazzàtu ti l’òtiu, ca no ppari tundu.
Perciò BASTA cu Bbombi e Ccarrarmàti!
Troppu tulùri la uèrra è rricalàti!
E ogn’unu la pò ffò la parti sua,
ncuminzandu, già, …ti casa sua.
di Emanuele Castrignanò
Per restare aggiornato seguici e metti “Mi piace” sulla nostra pagina facebook, pubblicheremo al più presto tutti gli aggiornamenti in merito.
Seguici su Facebook: https://www.facebook.com/mesagnesera/
