La Matonna ti lu Carmunu 2016

Un dono di Padre Carmelo (nella foto) a tutte le nostre famiglie, ai nostri parenti, agli amici perché la gustino,  riflettano e ne facciano dono a loro volta agli altri mesagnesi.
Mamma ce bedda la Matonna/ comu ‘na mamma, zia o nonna; /ogni vota ca la uardu ti luntanu/ sembra ca riti e mi zzicca la manu./ Edda sapi cuddu ca vogghiu  moni/ ca scta chiangu comu ‘nu vagnoni./ Vogghiu Misciagni totta pulita/ comu lu zitu ca va trova la zita,/ e cu  sparesci totta la mmucaria/  ‘nci vuole ‘na bella Ave Maria?/  Vogghiu puru fatia sicura pi tutti/ ti Misciagni vecchia ‘nzinu ‘alli  Grutti; /e cu sì leva la puzza ti li tombini,/ cu rispiramo tutti li naschi fini./ Vulia cu sctava sicuru ‘ntra casa mia/ senza chiai o allarmi, mamma Maria. / Tutti allerta, vigili urbani e polizia/cu no trasi a Misciagni ci sia sia./Ma ce ‘ nci voli poi, cummari mia, cu  fannu  ‘na  liscta e controlli, ‘do sia sia?/ Vulia li sctrati sfaltati, lisci lisci/ e chiu’ chiari quiddi benedetti sctrisci. / Li motorini poi  cu siunu controllati / pi la saluti nosctra e di lì  scapisctrati./ Vulia cu torna la campagna in fiori/ comu l’ era criata iddu, lu Signori:/ Arvuli cu fiuri,  vigni e tanti frutti / ca senza paura li cugghi e ti li gnutti;/ li campagni cu ogni beni ti Diu/ ua, peschi, muluni, mi li ricordu iu;/ pummitori, citruli, aulii e fichi/ cu lu sapori veru, ti li cosi antichi./  Vulia la Villa cu li sciardinieri /  comu Pagghialonga… mi sembra ieri!/ ‘Na villa e ‘nu  parcu puru cu l’animali/ ma ognuno allu posto sua cu no’ faci mali. / Ogni quartieri cu ‘nu bellu villinu, / erva,  fiuri, pratu e arvuli ti pinu./   Ognunu cu lu uarda comu ” cosa mia”/ e cu scorna  a  ci faci cacca o pipia,/ a ci  scrivi e muca a  tutti vandi/ a ci iataca sacchetti oppuru mutandi. Vulia li crisctiani chiu’  scuscitati,/ cu sontu cuntienti, tutti prisciati/ tanti ca’puri ma ‘nu pinzieru sulu/ fori ti casa cu la seggia o allu pisulu./ ‘Na voci amica, ‘na voci gioiosa/ ci sctamu ‘mpaci  è n’atra cosa/ Matonna ti lu  Carmunu, patrona, /Misciagni cussini no’  ‘nci sctona/: a ‘nu paesi addo si canta  e sona, / tira aria sana, tira aria bona./ ‘Na Mamma cussini ‘ndi  voli felici / e datti da fari vagno’, ce ue’ dici  dici.” / iu cussini vulia la fescta ti la Matonna / comu ‘na zia, ‘na mamma…’na nonna.”!!
Misciagni no la uei puru tuni cussini?