Ti nomi sembra, nipoti a Paperinu.
Quddu famosu, ca tutti l‘amu lettu.
Li ttre niputi ca cu llu cuppulinu,
so’ persunaggi, ti ntra llu ggiurnalettu.
Ti tutti ttreti, lu nomi eti lu primu.
È nduvinieddu? E allora…nduvinati!
E ssimu assai, serai ca lu liggimu,
E (penza iddu) ndi teni assai nfurmati.
L’informazioni, però è nna cosa seria.
E vvoli cconta…li cosi bbelli e brutti.
Mma “paparieddu”, però: pi lla miseria!!
Mi sembra a mmei, ndi voli fotti a tutti.
Meli nni mena! Ca šdigna quantu è ddoci!
No nc’è nna cosa ca veni mai sbagliata.
Ti lu “guvernu” nni vanta assai la voci.
Misciagni…vergini…cchiù ti la Mmaculata.
Ci tu uè campi, nntra nn’isula felici,
ieni a Misciagni, ca no nci mueri mai.
So’ tutti bbravi, onešti e bbell’amici.
E hannu sparuti, lu chiantu cu lli uai.
Ci “paparieddu” nn’articulu ti faci.
Štatti sicuru, ca è sempri cosa bbona.
Ca “lu guvernu” ti tuttu è ormai capaci,
Ccussi lla canta, e megghiu ti la sona.
La delinquenza? Sparita! No nci nn‘eti!
Cu nna mascìa, Misciagni s’è sgumbrata.
Nienti succeti…però ci va’ ssucceti…
Rriva LA LEGGI! Ca megghiu mai nc’è štata!
No nc’è nnu fuessu!! Girandu ntra Misciagni.
No nc’è nna mmuca! Mancu nnu muzzoni.
Tuttu perfettu e nnienti cu tti lagni.
L’hannu cuntatu puru, ntra lla televisioni.
Tutti li ggiurni, leggu nnu ggiurnali.
Sembra…LA PRAVDA…ca foi ggiurnali russu.
Mma “paparieddu” è ncora cchiù spiciali.
Nna mmerda n’terra. E scrivi…ca eti lussu…
