Ieri sera a Piazza Orsini,
scii cu sentu to’ canzoni.
Ca sunava la “ppieffiemmi”.
e mmi tessi all’accasioni.
Vištu ca poi spessu spottu,
pi lli “puzzi” ca si fannu.
Caminava attientu, attientu,
casu mai va fazzu dannu.
Ntra lla Umana Meraviglia!
Ntra Misciagni mi truvai.
E mmi tissi: Tamburrì!
Uarda e bbabba, ha’ vištu mai!??
Uarda quà cce bomboniera!
Uè cafoni, cce uè ssai??
Eti propria la cchiù bbella,
ti ddo cazzu uè vvai, vai!!
Ccussi zambru comu sinti,
mo’ rruvini nnu paisi.
Cce uè sienti? Cce uè vviti!?
Pircé spindi šti turnisi!?
Non è ambienti cchiù pi ttei,
mò Misciagni è nn’atra cosa.
Ogni grandi persunaggiu,
veni qqua ca voli “posa”.
Ntra cultura e paparazzi,
fešti e bballi tutti seri.
Hollywuddu cu ssi scondi,
cqua li fatti sontu veri!!
Lu miraculu è successu,
ca nisciunu lu critìa.
La pulitaca cchiù dretta,
ndi šta bbinchia ti fatìa.
Ti šta sbagli ci šta pienzi,
ca nna cosa ccussì grandi.
Ca benessiri e turismu,
s’è llargatu a tanti vandi!
Ti šta sbagli propria assai,
nienti è mmai comu Misciagni.
Ti lu centru a ogni rrioni,
e poi nzin’a lli campagni.
Pi šta vota ca ha’ paiatu,
trasi e ssettiti, crimoni!!
Mmienzu a totta šta finezza,
tu si’ l’unucu barboni.
E poi tinci, crazzi a “iddu”
ca t’è ppuru suppurtatu.
Ntra šta Umana Meraviglia,
quantu lussu t’ha’ pigghiatu!!
Di Luigi Tamburrini, nella foto
